நடிகர் விஜய்யின் தமிழக வெற்றிக்கழகத்தில் விடுதலை சிறுத்தைகள் கட்சியின் முன்னாள் துணை பொதுச்செயலாளர் ஆதவ் அர்ஜூனா இணைய வாய்ப்புள்ளதாக தகவல்கள் தெரிவிக்கின்றன. ஆதவ் அர்ஜூனாவிற்கு தவெகவில் முக்கிய பொறுப்பு வழங்கப்படலாம் என எதிர்பார்க்கப்படுகிறது.
திராவிட கட்சிகளுக்கு போட்டியாக விஜய்
தமிழகத்தில் அரை நூற்றாண்டு காலத்திற்கும் மேலாக திமுக- அதிமுக ஆகிய கட்சிகள் மட்டுமே மாறி மாறி ஆட்சி அமைத்து வருகிறது. அந்த வகையில் இந்த கட்சிகளுக்கு எதிராக பல நடிகர்கள் கட்சி தொடங்கிய நிலையில் ஒரு சில ஆண்டுகளில் இந்த திராவிட கட்சிகளுடனே கூட்டணி வைக்கும் நிலை உருவாகிவிடும்.
இந்த நிலையில் தமிழகத்தில் புதிய அரசியல் மாற்றத்தை உருவாக்கப்போவதாக களத்தில் இறங்கியுள்ளார் நடிகர் விஜய், ஒரு படத்திற்கு 100 கோடி ரூபாய்க்கு மேல் சம்பளம் வாங்கி வரும் விஜய் அனைத்தையும் தூக்கி ஏறிந்து விட்டு தமிழக வெற்றிக்கழகம் என்ற அரசியல் கட்சியை தொடங்கியுள்ளார்.