ஹெஸ்பொலா வீழ்ச்சியடைந்ததா? இஸ்ரேல் – லெபனான் குறித்த முக்கிய கேள்விகள் மற்றும் பதில்கள்!

ஏப்ரல் மாதத்தில் சிரியா தலைநகர் டமாஸ்கஸில் உள்ள இரானிய தூதரகத்தில் ராணுவ தளபதிகள் உட்பட 8 பேர் மரணத்திற்கு காரணமாக இருந்த இஸ்ரேல் தாக்குதலுக்கு உடனடியாக எதிர்வினையாற்றியது இரான். இஸ்ரேல் மீது நூற்றுக்கணக்கில் ஏவுகணைகளையும் ஆளில்லா விமானங்களையும் ஏவி தாக்குதல் நடத்தியது.

டெஹ்ரானில் கடந்த ஜூலையில் ஹமாஸின் அரசியல் பிரிவு தலைவர் இஸ்மாயில் ஹனியே கொல்லப்பட்டதற்கு எதிர்வினையாற்றிய இரான் இஸ்ரேல் மீது பதில் தாக்குதல் நடத்துவோம் என்று கூறியது. ஆனால் இதுவரை பதில் தாக்குதல் தொடர்பாக எந்த அறிவிப்பையும் இரான் வெளியிடவில்லை.

இஸ்ரேலுடன் முன்பு சண்டை நடந்துள்ளதா?

பிபிசியின் சர்வதேச விவகாரங்கள் ஆசிரியர், ஜெரிமி போவன், “இதற்கு முன்பும் லெபனானில் இஸ்ரேல் நுழைந்துள்ளது. கடந்த 1982-ம் ஆண்டில் இஸ்ரேல் படைகள் பெய்ரூட் வரை சென்றன. பின்னர் இஸ்ரேலின் லெபனான் கூட்டாளிகள் பெய்ரூட்டின் சப்ரா மற்றும் ஷாதிலா அகதிகள் முகாம்களில் பாலத்தீன மக்களை படுகொலை செய்தனர். இந்த நடவடிக்கை பரவலாக விமர்சிக்கப்பட்டதையடுத்து, இஸ்ரேல் ராணுவம் பின்வாங்க வேண்டியிருந்தது” என்கிறார்.

கடந்த 2006-ஆம் ஆண்டில் ஹெஸ்பொலா மற்றும் இஸ்ரேலுக்கு இடையே முழு வீச்சிலான போர் வெடித்தது. இது, எல்லை கடந்த ஹெஸ்பொலாவின் தாக்குதலால் தூண்டப்பட்டது.

எனினும், 2006-ல் இருந்து ஹெஸ்பொலா அதிகம் வளர்ந்துள்ளது. சிரிய போரில் சண்டையிட்டதன் மூலம் அனுபவம் பெற்றுள்ளது. இரான் ஆதரவுடன் அதன் ஆயுத பலம் பலமடங்கு உயர்ந்துள்ளது. இஸ்ரேலிடமும் மேம்பட்ட ஆயுதங்கள் உள்ளன. ஏவுகணைகளை இடைமறித்து அழிக்கும் ‘அயர்ன் டோம்’ என்ற வான் பாதுகாப்பு அமைப்பு அதனிடம் உள்ளது. ஆனால், 2006-ஆம் ஆண்டைப் போலல்லாமல் இந்த முறை காஸாவிலும் இஸ்ரேல் போரில் ஈடுபட்டுள்ளது.

இப்போது சண்டை ஏன் நடக்கிறது?

கடந்தாண்டு அக்டோபர் 7-ஆம் தேதியன்று இஸ்ரேல் மீது ஹமாஸ் திடீரென தாக்குதல் நடத்தியதைத் தொடர்ந்து, காஸாவில் இஸ்ரேல் தாக்குதல் நடவடிக்கையை தொடங்கியது. பாலத்தீனர்களுக்கு ஆதரவாக இஸ்ரேலின் நிலைகளின் மீது ஹெஸ்பொலா தாக்குதல் நடத்தியது. இதையடுத்து, இஸ்ரேலுக்கும் ஹெஸ்பொலாவுக்கும் ஆங்காங்கே சண்டைகள் நடைபெற்று வந்தன.

இஸ்ரேல் படைகள் வான்வழி தாக்குதல்கள் மற்றும் பீரங்கிகள் மூலமாக லெபனானில் உள்ள ஹெஸ்பொலா நிலைகள் மீது தாக்குதல் நடத்தின. அதேநேரத்தில், இதுவரை வடக்கு இஸ்ரேல் மற்றும் இஸ்ரேல் ஆக்கிரமித்துள்ள கோலன் குன்றுகளை நோக்கி 8,000க்கும் மேற்பட்ட ராக்கெட்டுகளை ஹெஸ்பொலா ஏவியுள்ளது. பீரங்கி எதிர்ப்பு ஏவுகணைகளையும் இஸ்ரேலுக்கு எதிராக அந்த அமைப்பு ஏவியுள்ளது.

கடந்த ஜூலை 30-ஆம் தேதியன்று பெய்ரூட்டில் நடைபெற்ற வான்வழி தாக்குதலில் ஹெஸ்பொலா ராணுவ தளபதி ஃபாவுத் ஷுக்ர்-ஐ கொலை செய்ததாக இஸ்ரேல் ராணுவம் அறிவித்தது.

அதற்கடுத்த நாள், ஹமாஸின் அரசியல் பிரிவு தலைவர் இஸ்மாயில் ஹனியே இரான் தலைநகர் டெஹ்ரானில் கொல்லப்பட்டார். இதற்கு இஸ்ரேல் தான் காரணம் என இரான் கூறிய நிலையில், இஸ்ரேல் அந்த குற்றச்சாட்டை உறுதிப்படுத்தவும் இல்லை, மறுக்கவும் இல்லை.